Est acabau s'àxiu de Rossella Urru. Sa Sardigna afestat

(IlMinuto) – Casteddu, 19 de su mesi de argiolas - Arrapignada su mesi de ledàminis passau de unu grupu chi no est de acórdiu cun Al Qaeda de unu campu po disterraus Saharawi a pagus chilómitrus de Tinduf in su meridioni de s'Algeria, Rossella Urru e is àterus duus assistentis ispagnolus Ainhoa Fernández del Rincón i Enric Gonyalons funt fiamenti liberus. Sa nova fata connosci de su Follu ariseru a mangianu est stétia cunfirmada uficialmenti de sa Farnesina pagu primu de is 20.00. Una diri de ànsia sa de su 18 de su mesi de argiolas de su 2012, in su meigama difatis est lompia s'isceda de su liberamentu de is tres assistentis po buca de sa boxi de s'organizatzioni chi ddus teniat in ostàgiu Ansar Al Din Sanda Ould Boumama. Una nova cunfirmada de su ministru Terzi scéti in su merì. In Samugheo, bidda de Rossella Urru a pustis de noi mesis de dolori e agoa de sa delusioni tenta po mori de s'isceda farsa de calencunu mesi fait si respirat fiamenti ària de libertadi