Brothers of Rock IV: su 27 de su mesi de argiolas torrat s'atopu cun su memorial Luca&Bobo

(IlMinuto) – Casteddu, 20 de su mesi de argiolas - Solidariedadi, amigàntzia, e rock’n’roll in s'amentu de Luca e Bobo Chiarelli, "piciocus ispecialis - custus is fueddus impitaus de is amigus po amentai a is duus fradis cun d-un'amori apicigosu po sa música - chentza de is calis no iaus a essi su chi seus". Ocannu puru ant essi custus is ingredientis de su Brothers of Rock, su memorial in programa cenàbara 27 de su mesi de argiolas in su Corto Maltese, Poetu de Casteddu, a cumentzai de is 21.30. In sa IV editzioni puru su Brothers at a propòniri unu menù fatu de su rock de sèmpiri. Band protagonistas de su merì ant essi is Brothers of Rock, su grupu fatu de unus cantu de amigus de Luca e Bobo, is Signs of life, cover band de is Pink Floyd, su rock diversu de is Var, s'hard rock de Io, Lisa e sa ciculata e is SoftLoud, chi ant a presentai su discu nou “Emotional Anatonomy”. S'avenimentu - in su 2012 puru est aprontau cun s'agiudu de Gianfranco Tintis, presidenti de s'Admo de Cuartu Sant'Aleni setzioni Andrea Iovino - un'atopu chi in is annus at permitiu de arragolli unu númeru mannu de iscritus nous a su registru de is donadoris de mueddu de s'ossu. Una fortuna chi is aprontadoris isperant de torrai a arrapiti cida chi benit puru. Sa donatzioni, cun ténnicas chi no funt prus 'invasive', permitit difatis de sanai a is chi tenint s'anemia mediterranea fintzas a su 80 po centu de is casus