In Pirri duas diris po fueddai de energia e sustenibilidadi ambientali

(IlMinuto) – Casteddu, 8 de su mesi de maju - Su Comitau Solar Days Sardigna aprontat in su parcu de s'ex Birdieria de Pirri, po is diris 12 e 13 de su mesi de maju, a cumentzai de is 9.00 fintzas a is 20.00, s'"European Solar Days 2012". S'avenimentu si sboddiat in su circùitu de su programa Intelligent Energy Europe i est finatziau puru de sa Comissioni Europea diretzioni Generali Energia. In is duas diris, entis públicus, universidadis, iscolas, assótzius, comitaus, aziendas públicas e privadas, professionistas e tzitadinus scapus ant essi lamaus a fueddai, a si cunfrontai e a amanniai is próprius connoscéntzias asuba de is temas chi chistionant de ambienti, oi prus de sèmpiri de atualidadi. S'iscopu de sa proposta, si ligit in d-una nota de imprenta de su Comitau est "donai scedas apitzus de is energias rennovàbilis" e "forniri spricaduras asuba de is agiudus statalis o regionalis". Agoa de sa fortuna de is editzionis passadas, sa primu de su 2008 e sa segunda de su 2011, su Comitau Aprontadori Sola Days Sardigna fait duncas duas diris innoia, acanta de is avenimentus de sceda, ddoi at essi logu po mamentus didàticus de giogu e po mamentus de recreu totus dedicaus a is pipius, ddoi at essi puru un'aparada de prodotus po is energias rennovàbilis e s'isvilupu sustenìbili. Po ndi sciri de prus castiai su giassu a s'indiritzu: www.solardays.eu