"Disfavorèsseus is Quiz Invalsi". In Aristanis assembrea pública primu de s'isciòpiru

(IlMinuto) – Casteddu, 2 de su mesi de maju - Ita funt is quiz Invalsi? Po chini no dd'essat scipiu funt beríficas fatas a sa fini de cuadrimestri po valutai, in peschentu, sa bravura de is classis. Una procedura chi ocannu at essi fata comenti esperimentu po diventai difinitiva in is annus iscolasticus chi benint. Sa cosa prus importanti est perou su fatu ca una parti de is finantziamentus donaus a is iscolas ant essi acapiaus a is arrasurtaus de custas proas. In àterus fueddus is istitutus iscolasticus ant essi "premiaus" po su livellu de is test Invalsi. Unu protzedimentu chi at a oberri iscenarius malus meda po s'istrutzioni pública. Po is datas fissadas po is test Invalsi is Cobas cumbidant maistus e traballadoris Ata a isciopirai. Un'isciòpiru de totu sa diri "de su 9 de su mesi de maju po is elementaris, de su 10 po is médias e de su 16 po is superioris - si ligit in d-una nota sindacali - aprontau po protestai contra a un'iscola-quiz e un'iscola-miseresa chi destruint materialmenti e culturalmenti smenguendidda a infarinadura de notzionis generalis e genericas, trasformendi is maistus in scussadoris a is quiz". Asuba de sa chistioni Invalsi su sindacau de basi de s'iscola e su Cordinamentu Precàrius Iscola Aristanis aprontant po gióbia 3 de su mesi de maju a is 17.00, in s'àula Cps de su lizeu Clàssicu de Aristanis, s'assembrea pública "Disfavorèsseus is Quiz Invalsi".