"Su Sardu in tres paraulas". Tucat in Tàtari su cursu de língua sarda aprontau de Su Majolu

(IlMinuto) – Casteddu, 26 de su mesi de arbili – At essi s'àula I (II pranu de su palatzu de arruga Zanfarino) de sa Facoltadi de Líteras de Tàtari a aghilliri su cursu de língua sarda "Su Sardu in tres paraulas", chi at a cumentzai su 3 de su mesi de maju chi benit a is 10.00. Su cursu, in tres módulus, at essi obertu de Diegu Corràine, chi at a fueddai de su sardu istandard fadendi un'excursus de totus is propostas de is istandard linguísticus e ortogràficus chi funt stétias fatas de is annus '70 fintzas a lompi a sa Lsc, chi at essi imparada a is scientis de issu etotu. Su segundu módulu, ddu at a fai Bruno Sini, e at a chistionai de sa comunicatzioni e de sa iscridura giornalistica in língua sarda. Tuchendi de su cunfrontu intre artículus e àterus paperis iscritus in sardu s'at a lompi a analizai is difaréntzias intre sa iscridura populari e s'iscridura arta, atesu duncas de sa língua fueddada. Su terzu e úrtimu módulu at essi fatu de Mario Puddu, chi at a amostai is difaréntzias foneticas de is diversas fueddadas e at a imparai a is scientis is fenómenus fonosintàticus de totus is variantis, amostendi is arrégulas útilis po normalitzai s'iscridura. A s'acabu de su cursu est prevìdiu un'esàminu: is chi ant a pigai parti a is letzionis ant a depi fai unu test asuba de is argumentus de is tres módulus e ant a depi fai unu temixeddu in língua sarda. Sa comissioni at essi fata de is maistus de su cursu. "Su Sardu in tres paraulas" est a gratis i est obertu a totus, istudiantis e traballadoris. Su cursu est stétiu finantziau de s'Universidadi de Tàtari. Po s'iscriri telefonai a su númeru: 3299694001