"Su bilinguismu de is pipius": banalidadis e bideas faddias asuba de s'impitu de su sardu in família

(IlMinuto) – Casteddu, 30 de su mesi de arbili - Fai connosci un'informatzioni giusta asuba de su bilinguismu est possíbbili atressu de sa connoscéntzia de is profetus suus. Custa informatzioni iat a agiudai totus is línguas de minoria, intre custas su sardu, comenti una resossa e no comenti un'impedimentu. Pentzai ca fueddai sa língua sarda opugnit simpitu bellu e s'imparamentu bonu de s'italiana est, difatis, unu pregiuditziu istérriu chi est netzessàriu sderrexinai. Est custu su coru de su chistionu fatu de sa professoressa Antonella Sorace, istudiosa de bilinguismu de s'Universidadi de Edimburgo, chi sàbudu passau, po su seminàriu "Su bilinguismu de is pipius", aprontau de sa Regioni po Sa Die de Sa Sardigna, in collegamentu Skype de sa Scozia, a petus de unu públicu atentu chi preniat sa saba de sa Biblioteca Regionali de Casteddu, at pretzisau cantu bideas faddias e banalidadis ddoi funt in is possibilidadis chi is pipus fueddint e intendant fueddai sa língua de minoria in família e a foras de sa família etotu. Po sa beridadi ddoi funt istudius chi cumprovant ca is pipius chi scint duas línguas isvilupant abiléntzias prus mannas de imparamentu, imparint primu a ligi, e no siant cunfusus po nudda. Ita fai duncas po contrariai custus pregiuditzius? Sa Regioni, ant pretzisau Antonella Sorace e Giuseppe Corongiu, Diretori de su Servìtziu Limba Sarda de sa Ras, tenit idea de cumentzai una coperatzioni cun s'Universidadi de Edimburgu cun s'obietivu de fai nasci in Sardigna una filiali de Bilinguism Matters, progetu chi tenit s'iscopu  de aglianai totus is tipus de bilinguismu connotu in diversus logus de Europa.