Progetu Lianora: est spaciendi su tempus po s'Avaloramentu de efetu ambientali. Fortuna po s'arregorta de is firmas contra a su pertusamentu

(IlMinuto) – Casteddu, 2 de su mesi de arbili - Funt spaciendi is diris po presentai is osservas e sa dimanda de Avaloramentu de efetu ambientali asuba de su progetu Lianora a is ofítzius regionalis cumpetentis. Prusaprestu, mancai su tempus siat spaciendi, su Síndigu de Arborea sighit a desogai sa chistioni "pertusamentu de S'Ena Arrubia". De s'àtera parti, su Comitau cívicu "No a su Progetu Lianora" at sighiu a traballai chentza de pàsiu, fadendi arribai a su Serbítziu Savi (Serbítziu sustenibilidadi ambientali e avaloramentu efetus) 170 documentus e prus de Osservas e dimandas de V.i.a., a custus andant aciuntas is 300 firmas e prus contrarias a su progetu e chi funt stétias pigadas scéti in sa diri de martis 20 de su mesi de martzu, data chi inghitzu de s'arregorda de is firmas. Diversus is documentus arribaus in sa mesa de su Serbítziu Savi, medas de custus funt de tzitadinus e imprendidoris de Arborea e de sa Provìntzia de Aristanis, àterus arribant inderetura de is territórius de sa Lucania e de is logus de Rovigu, destruidus de is pertusamentus. No ddoi est - pretzisat una nota de imprenta de su Comitau cívicu 'No a su Progetu Lianora' - "ddu naraus cun dispraxeri mannu, una dimanda de Avaloramentu de Efetu Ambientali de parti de su Comunu de Arborea", "custu - sighit su comitau - mancai unus cantu de membrus de s'Amministratzioni comunali de Arborea, po primu su Vicesíndigu, si siant declaraus contras a su Progetu"