Interrogatzioni de Giuseppe Cuccu a s'assessori Milia "Sa língua sarda arriscat de iscumpàrriri po sèmpiri"

(IlMinuto) – Casteddu, 5 de su mesi de arbili - A cantu narat su coma 5 de s'artículu 4 de sa lei 482/99, norma chi amparat is minorias linguìsticas istóricas in apricu a s'artículu 6 de sa Costitutzioni italiana, "a su mamentu de sa de sa 'preiscrizione' is babus e is mamas comunicant a s'istitutzioni iscolastica interessada si tenint intentzioni de avalerisì po is próprius fillus de s'imparamentu de sa língua de sa minoria". Ma comenti faint is babus e is mamas sardas a sceberai o a no sceberai po is próprius fillus s'imparamentu de sa língua sarda, si sa mantessi s'iscola, a su mamentu de s'iscritzioni no tenit su módulu complementari, módulu chi imbecis amostat regolarmenti po s'imparamentu de sa religioni catolica? Asuba de sa chistioni fueddat in Consillu Regionali su consilleri de su Pd Giuseppe Cuccu. Est difatis datada cenàbara 30 de su mesi de martzu s'interrogatzioni cun dimanda de arraspusta iscrita, fata a s'assessori regionali a sa Pública Istrutzioni, Benis Culturalis, Informatzioni, Ispetàculu e Isport Sergio Milia, de su rapresentanti de su Partidu Democràticu a propósitu de s'imparamentu de sa língua e cultura sarda in is iscolas. "Sa língua sarda - narat Cuccu - arriscat de iscumpàrriri po sèmpiri e cun issa puru su patrimoniu culturali istremenau de su pópulu sardu", "scéti atressu de is políticas linguìsticas - sighit su consilleri de su Pd - chi promovant s'imparamentu de sa língua e cultura sarda in is iscolas iaus a podi furriai custa annantza".