Tzínema: is diversas facis de s'emigratzioni cun "Mundunou. Proietzioni e atopous asuba de is caminus de is furesteris"

(IlMinuto) – Casteddu, 22 de su mesi de martzu – Est cumentzada su 20 de su mesi de martzu passau, in is aposentus de su Teatru Andrianu de arruga Tàtari in Casteddu, sa rassegna de tzínema "Mundunou. Proietzionis e atopous asuba de is caminus de is furesteris". Sa proposta culturali est aprontada de su Círculu FICC "Laboratorio 28" e de s'assótziu TERRA – Progetu Baobab, cun s'agiudu de s'assótziu Art’in e is cuntribus de s'Universidadi de is Istudius de Casteddu e de sa Regioni Autónoma de Sardigna. Sa rassegna at a sighiri fintzas a su 22 de su mesi de maju in sa domu de "Laboratorio 28", in arruga Montesanto. S'arricu programa de "Mundunou. Proietzioni e atopous asuba de is caminus de is furesteris" si movit intre tzínema, música e literadura e tenit comenti iscopu su de "analitzai su tema de is emigratzionis in totus is facis suas". Arrica puru sa lista de is òspitis prevìdius: su sociòlogu Alessandro Dal Lago, s'antropologu Francesco Bachis, su regista Andrea Segre, su scriidori e musicista Marco Rovelli e is registas Gaetano Crivaro e Margherita Pisano. "In su própriu tempus de sa rassegna - si ligit in d-una nota de imprenta - s'ant a tenni seminàrius de imparu asuba de su tema de is emigratzionis, de s''intercultura' e da resisténtzia passiva".