Trasportus. ProgRes: "Continuidadi territoriali dexinas de milionis in arregalu a is compagnias aéreas"

(IlMinuto) – Casteddu, 13 de su mesi de martzu - Is dexinas de milionis de eurus chi sa Finantziaria regionali donat po sa continuidadi territoriali funt un'àteru dispéndiu "in donus a is compagnias aéreas". Est cantu narat in d-una nota de imprenta ProgRes. "Cun su dinai chi sa Regioni Autónoma de sa Sardigna ponit in custa operatzioni (47 milionis de eurus po tres annus) – si ligit in su comunicau fatu connosci de s'organizatzioni indipendentista ProgRes - iat essi possíbili, chentza de aciungi mesu tzentésimu (datus de su Cab, Civil Aeronautic Board), a si furniri de una compagnia aérea sarda, asuba de is tretus chi interessant a nos e chi serbint a is abisóngius económicus e culturalis". Su dinai de sa continuidadi territoriali at essi impitau po finatziai is viàgius aéreus chi tucant de sa Sardigna e chi lompint in Sardigna, ponendi a parti sa residéntzia e su logu de nàscida de su passigeri. "Su dinai de is sardus - scririt ProgRes - andat impitau po is abisóngius e is diritus nostrus. Asuba de custu trubaus a s' arringherai totus is fortzas políticas sentzeras, votadas a su beni cumunu,  totus is tzitadinus chi no siant tambeni risinnaus a essi sudditus chenzta de boxi".