"Cosa de macus": su film nou de Enrico Pitzianti de su 16 a 22 de su mesi de martzu in su tzínema

(IlMinuto) - Casteddu, 14 de su mesi de martzu - Tenit comenti títulu "Cosa de macus. Un'istória bera: sa circa de una domu po si ndi torrai a pigai sa vida" s'úrtimu film de Enrico Pitzianti in programma de su 16 a su 22 de su mesi de martzu in is aposentus de su Cineworld de Casteddu, in is de su The Space tzínema de Cuartucciu e a su Greenwich d'Essai, su círculu de su tzínema casteddaiu de bia Tàtari. Una produtzioni chi at biu a su regista traballai cun d-unu cast ispeciali: is residentis e is operadoris de Casamatta, domu sotziali e de assistu de Cuartu Sant'Aleni aundi bivint otu personis cun istrobus a conca. Su film contat própriu s'istória de custa istrutura, chi cun 17 annus  de vida scéti benit giai cunsiderada meda ainnantis in su panorama mondiali, "unu logu aundi - si ligit in d-una nota - is personis cun sufaréntzias mentalis podint isperai de si torrai a fai una vida". Addolumannu oi sa residéntzia arriscat de serrai: s'Asarp, assótziu chi dda tenit in gestioni, no nci dda fait prus a mandai ainnantis s'istrutura. Enrico Pitzianti si frimat puru asuba de s'apómpiu chi tenint is familiaris de is malàdius impari a Gisella Trincas, presidenti de s'assótziu Asarp Casamatta e sorri de una de is òspitis,  afrontendi is aprentus i comenti tenit sa frimesa de agatai una solutzioni.