Comitadu pro sa limba sarda: "Su Consillu de is Ministrus no at ratificau su Paperi europeu. Ant fatu connosci unu comunicau fadiu

(IlMinuto) - Casteddu, 14 de su mesi de martzu - Sighit sa lota in faori de sa língua sarda mandada a innantis de su Comitadu pro sa limba sarda. Custa borta sa protesta pertocat unu comunicau apitzus de sa presunta ratífica de su "Paperi europeu de is línguas regionalis o de minoria" de parti de su Consillu de is Ministrus, fatu connosci su 9 de su mesi de martzu passau, e chi isvelau fadiu est stétiu currégiu, ma chentza de fai connosci una ratífica ufitziali. Sa nota de imprenta bessia in su giassu de su Consillu de is Ministrus at difatis incidau acoitu diversus dúbius "intre is prus atentus osservadoris de su movimentu linguísticu sardu". "Difatis furiat stétiu fatu notai - pretzisat unu comunicau de Su Comitadu pro sa limba sarda - comenti is trataus internatzionalis segundu is artículus 80 e 87 de sa Costitutzioni fessant ratificabilis cun sa firma de su presidenti de sa Repúbrica, sa cunvalida de su presidenti de su Consillu de is Ministrus ma prévia 'autorizatzioni de is Camera'". Agoa de pagu diris, su comunicau originàriu est stétiu currégiu, cun sa naradura giusta: "Su Consillu de is Ministrus, a pabas de sa proposta de su Ministeru de is afàrius ésterus e de su Ministri de is afàrius regionalis, at aprovau su disignu de ratífica de su Paperi europeu de is línguas regionalis o de minoria". "Custu bolit nai - acrarat su Comitadu - ca su prexiu manifestau cun facilidadi de genti meda po custu atu de cumentzu, comentisiollat positivu, chi at a podi portai a sa ratífica de su Paperi europeu de is línguas, depit fai is contus cun su possíbili arenamentu in is Cameras de su de su disignu de lei de ratífica comenti puru cun sa possibilidadi de sa bulladura sua". Mancai s'impitu de su cunditzionali, assolutamenti ligítimu bia s'auséntzia de sa publicatzioni de unu comunicau de imprenta nou chi essat acrarau s'arràntzia fata a petus de sa primu comunicatzioni, Su Comitadu si augurat "chi su disignu de lei asuba de sa ratífica de su Paperi europeu de is línguas sigat lestru meda abia de s'aprou suu chi s'abetat de 20 annus e prus in s'interessu de sa democratzia e de s'arrispetu de is diritus tzivilis".