Arrestaus cumponentis comitau "S'Arriedu po Narabuja". ProgReS "solidariedadi a is duus tzitadinus"

(IlMinuto) – Casteddu, 28 de su mesi de fiàrgiu - Si lamat "EnerVitaBio", benit de Ravenna e s'incarrerat a ponni 30 ètaru e prus de serras "fotovoltaiche" po unu tretu de unu milioni de metrus cuadraus de terra in localidadi S’Arrieddu in Narabuja. Sa genti de sa bidda in Provìntzia de Aristanis s'oponit a su cantieri de su Parcu "fotovoltaico" chi sa sotziedadi EnerVitaBio bolit acabai intru sa fini de s'annu a pagu centinas de metrus de is domus de Narabuja. Su pichetu de su comitau populari contra a su progetu de custu campu "fotovoltaico" smesurau est acabau lúnis a mangianu cun duus arrestus, su de Nello Schirru, presidenti de su comitau "S'Arriedu po Narabuja", e su de su fillu Alessandro. Apitzus de s'afari "fotovoltaico" fueddat puru Progetu Repùblica Aristanis. "ProgReS – si ligit in d-una nota de imprenta - no est contra a s'energia pulia e no est nimancu contra a su 'fotovoltaico [...]'. Creeus imbecis ca, [...] potzant essi una resossa manna po su tempus benidori de is Sardus e de sa Sardigna.Su chi lassat a buca oberta - pretzisat Progetu Repùblica - est comenti custus impiantus bengat sèmpiri impostus evitendi de pigai in cunsidériu is particularidadis de su logu e su chi produsint is comunidadis interessadas". Intre de pagu tempus s'organizatzioni indipendentista, atressu de su rapresentanti suu, Sebastian Madau, at a presentai un'interrogatzioni in Provìntzia in Aristanis, pedendu arrespustas a chini ndi tenit cumpeténtzia in Provìntzia e in Regioni. ProgReS - sighit su comunicau de imprenta - "espressat solidariedadi a is duus tzitadinus de Narabuja arrestaus po ai manifestau su disacórdiu insoru e at a sighiri a acastiai apitzus de s'acontéssia".