Movimentu No Galsi. Durbiano (No Tav): "Cun su metanodotu dannus po medas a faci de is interessus de pagus"

(IlMinuto) – Casteddu, 2 de su mesi de gennàrgiu - "Su metanodotu est un'òpera chi fait s'interessu de pagus a faci de is dannu de is medas. Seus ascurtendi sa música de sèmpiri". Cun custus fueddus Nilo Durbiano, síndigu de Venaus e rapresentanti de su movimentu NO Tav, at chistionau in su cunvennu No Galsi chi s'est tentu su 29 de su mesi de paschixèdda in Casteddu. De 20 annus su movimentu populari gherrat contra a su fàbricu de sa línia po is trenus lestrus meda, cun d-un'aumentu mannu de is adesionis de sa genti a sa lota. "Tres minutus o trinta segundus in d-unu telegiornali - at nau Durbiano – lompint a milionis de personis, nos depeus andai eca po eca. In 20 annus eus fatu prus de 100 assembreas in totus is comunus interessaus. Sa primu manifestada chi s'est tenta 20 annus fait no at biu nimencu 3milla ànimas. S'úrtims manifestada manna in su mesi de argiolas de su 2011 at biu 70milla personis, est a nai su númerus de is abitantis chi ddoi funt in sa Val di Susa".