"Consulta de is movimentus": ocupaus noi comunus, solidariedadi a is traballadoris Alcoa

(IlMinuto) – Casteddu, 26 de su mesi de gennàrgiu - De is fueddus a is fatus. Fintzas a imoi funt noi is domus de is Comunus ocupadas de sa Consulta de is movimentus agoa de s'assembrea de martis in Tramatza: Crabònia, Domunoas, Teulada, Ollolai, Itiri Cannedu, Nujvi, Biddacidru e Silìcua. Ariseru sa Consulta chi aghillit a su Mps, a su "Movimento Artigiani e Commercianti Liberi", a is autotrasportadoris de "Sardegna in movimento", a Irs,  a Sardigna Natzione Indipendentzia, a su "Movimento Anti-Equitalia", a su "Presidio di Viale Trento", a is "Donne del Digiuno di Viale Trento" e a is "Pratici" at atopau e donau sa solidariedadi a is traballadoris Alcoa chi manifestànt in Casteddu.De su tempus benidori de is operàjus de sa multinatzionali de Pittsburgh s'at a fueddai oi in Roma in d-un'atóbiu cun su Guvernu, sa Regioni, Alcoa e cun sa svitzera Glencore, fortzis interessada a si pigai sa fàbrica de allumíniu. In su trastempus sa batalla de sa Consulta de is movimentus sighit puru in Terranòa, aundi sighit sa frimada de su Portu e in Ogiastra cun sa propaganda atressu de follieddus in sa 125.