Casteddu, proponit duas línguas po is arrugas de sa tzitadi. Lobina (Fds): “Scancellai de is nòminis de is bias is fascistas Endrich e Sorcinelli”

(IlMinuto) – Casteddu, 9 de su mesi de gennàrgiu - In is cidas chi benint su Consillu comunali de Casteddu at chistionai de una proposta po afortiai sa cultura sarda cun s'impitu de duas línguas in is nòminis de bias e pratzas tzitadinas, proposta chi imprendat a sa Giunta e a su síndigu a sburrai de is arrugas e de is pratzas unus cantu de figuras istóricas de su fascismu in Sardigna. Apitzus de su tema fueddat Enrico Lobina, consilleri comunali de su Prc in Casteddu, intre is firmatàrius de su documentu. "Donai a is bias nostras is nòminis originalis in sardu - scririt Lobina - iat a agiudai a aguantai biu su códixi linguìsticu chi is casteddaius ant impitau istoricamenti". Ma po su consilleri de sa Fds torrai a ponni is nòminis originalis a is arrugas e a is pratzas depit essi acumpanzau puru de sa scancellatzioni de personàgius comenti Erricu Endrich, podestadi de Castedu, e a s'industriali Ferruccio Sorcinelli. "Custus personàgius - pretzisat su consilleri Fds - funt stétius arrapresentantis de importu mannu in su Partidu Natzionali Fascista in is annus de su regimi, afiantzendi medas atzionis grais de scontróriu scuadrista mai arrefudadas. Seu cumbintu ca personàgius deaici no menescint nisciunu arreconnoscimentu in niscuna bia o pratza in Casteddu".