Alcoa cunfirmat sa serradura de Portovesme, ma in Londra s’allumíniu est prus caru. Sindacaus prontus a sa mobilitada

(IlMinuto) – Casteddu, 11 de su mesi de gennàrgiu - In Portovesme Alcoa serrat. Su determinu de sa multinatzionali de Pittsburgh, cunfirmau ariseru in Casteddu in d-un'atóbiu cun is rapresentantis sindacalis, at lassai chentza de traballu pagu prus de 800 personis in su Surcis. Cgil, Cisl e Uil funt prontus a si mobilitai po difèndiri su traballu. "Lúnis - si ligit in d-una nota de imprenta - s'ant atrumai is segreterias sindacalis po pigai is determinus netzessàrius, si fueddat puru de una mobilitada po difendi sa produtzioni industriali de sa Sardigna, chi bit Alcoa intre is arrichesas fundamentalis". Su presidenti de sa Regioni, Ugo Cappellacci, at avisau po oi un'atopu apretosu cun su Guvernu asuba de sa contienda. Ma po Vittorio Macrì, consilleri comunali in Crabònia de su Prc-Fds, sa Giunta tenit crupas grais poita "in custus mesis s'est sansiada pellonghendi sa chistioni Alcoa a su 31 de su mesi de paschixèdda de su 2012, no donendi ascurtu a is traballadoris e a is organizatzionis sindacalis chi de diversus mesis, chentza de pàsiu, circat de tenni arta s'atentzioni asuba de su chi acontessint in fàbrica". In su matessi tempus su giassu económicu-finatziariu Firspost.com arrexonat apitzus de is contus de sa multinatzionali: sa serradura de una parti manna de is iscallatórius cinesus iat a depi portai difatis a un'aumentu de su prétziu de s'allumíniu in su 2012. Martis in su London Metal Exchange su balimentu de s'allumíniu est cresciu giai de su 2,5 po centu.