Manifestada contra a su ratzismu: in Casteddu in 300 po nai ca no a su ratzismu e a su fascismu agoa de sa destrossa de Firenzi

(IlMinuto) – Casteddu, 21 de su mesi de paschixèdda - "Sa destrossa de is senegalesus, acontéssia in Firenzi in is diris passadas po mori de unu fascista. est stétia filla de sa propaganda manna e mala meda fata de sa dereta italiana contra a is furesteris". Est cantu si ligit in su follu donau ariseru a merì in Casteddu po sa manifestada contra a su ratzismu promòvia de sa comunidadi de is furesteris de su Senegal. Pagu prus de 300 personis ant isfilau de pratza de su Cramu a pratza Garibaldi denuntziendi a su ratzismu e sa preséntzia sèmpiri prus manna - e addolumannu aguantada - de is organizatzionis noas de su fascismu.