Galsi: in Serramanna atóbiu cun is tzitadinus. Totus is adesionis a sa manifestada “NoGasdotto” de su 10. Cras a Manca afestat a Bellomonte
(IlMinuto) – Casteddu, 7 de su mesi de paschixèdda - A pagu diris de sa Cuferéntzia de is Serbítzius de Roma de su 21 de su mesi de paschixèdda, chi iat a podi fai cumentzai is traballus de fàbricu de su Metanodotu Algeria Sardìnnia Itàlia, funt sèmpiri de prus is propostas de chini est contra, a sa, chi su mantessi Galsi lamat "Tzerachia de passada". Cenàbara a merì, 9 de su mesi de paschixedda, in Serramanna (Ex Montegranatico, 17.30) s'at a tenni s'atóbiu de sceda chi tenit comenti de tema “Galsi. Quali benefici per i sardi?” Un'atopu obertu a totu sa genti, cun is relatus de su consilleri regionali Claudia Zuncheddu (Indipendentistas), de Stefano Deliperi (Gruppo di intervento giuridico) e de Sandro Martis (Comitato ProSardegnaNoGasdotto). In su trastempus crescint is adesionis* a sa manifestada natzionali "NoGalsi" in programa po sàbudu 10 de su mesi de paschixèdda in Casteddu (pratza de is Centumilla, 10.30). "Sa manifestada - si ligit in d-una nota de imprenta de a Manca pro s’Indipendentzia, organizatzioni chi at promòviu sa cosa - at essi su primu passu po una campannia de traballu mannu e chentza pàsiu, contra a custa destross, de parti de sa manca indipendentista impari a is comitaus e a is sardus chi batallant contra a sa malasa de su progetu GALSI. Su Pópulu sardu, agoa de ai frimau su pirígulu de su nucleari, at a arrennesci a impediri custa àtera operatzioni". A Manca fait connosci un'àtera initziativa: "Benetorradu Bruno Bellomonte". Una festa po - pretzisat aMpI - "sa genti tataresa totu e po totus is sardus e is sardas chi ant pigau parti a binci sa batalla po sa liberatzioni de su dirigenti políticu nostru".
S'avenimentu at a cumentzai a is 12.00 e at a sighiri fintzas a merì cun música e àteru". S'atopu est a is 12.00 in Tàtari, in is aposentus de su "Dopolavoro" Ferruviariu.
*Comitato ProSardegnaNoGasdotto
A Manca pro s'Indipendentzia
Sinistra Critica sarda
Partito Comunista dei Lavoratori
Sinistra anticapitalista sarda
Collettivo anticapitalista sardo
Associazione Zirichiltaggia
Comunisti - Sinistra popolare di Cagliari e del Sulcis
Disarmiamoli Sardigna
Cagliari Social Forum
Solarussa in Movimento
Liberta' Sarda
Comitato Carlofortini Preoccupati
Gruppo Tutti i sardi contro il Galsi
Az.namusn.art (collettivo artistico)
Meetup 31 (Amici di Beppe Grillo in Sardegna)
Claudia Zuncheddu (consigliere regionale)
Massimiliano Mazzotta (regista)