Galsi: adesionis noas a sa manifestada de su 10. Dúbius apitzues de sa consultatzioni atressu de is sms de Sni e Css
(IlMinuto) – Casteddu, 6 de su mesi de paschixèdda - Crescint de diri in diri, mancai is giornalis e sa televisioni no apant donau boxi meda a s'atopu, is adesionis* a sa manifestada natzionali No Galsi e No Pozzo Saras in programma sàbudu in Casteddu (10.30, pratza de is Centumilla). "Sinistra Critica Sarda" at a pigai parti a su corteu e cumbidat a totus a cabai in pratza po nai ca no a su fàbricu de su metanodotu. "Est inganniosu - si ligit in d-una nota de imprenta de s'organizatzioni anticapitalista - s'aficàntzia a arremédius tramposus de s'úrtimu mamentu, comenti sa proposta de consultatzionis atressu de sms o s'invocatzioni de una "ricontrattazione" de is "royalties". Funt difatis disponìbilis totu is datus po si fai una bidea crara de su progetu castiendi a is dannus a s'ambienti e a s'ecunumia (messarítzia, pisca e turismu) e po cumprendi su tempus benidori de su 'programa sardu' comenti tzerachia energetica". A sa manifestada promòvia de aMpI ant a pigai parti puru Claudia Zuncheddu (arrapresentanti de is Indipendentistas in Consillu regionali), puru issa scréntili a faci de su votu atressu de is sms aprontau de Sni e Css. "Connoscendi sa seriedadi e s'impìnniu po sa Sardìnnia de is duas organizatzionis políticas - scririt Zuncheddu - m'ap'a essi abetada chi primu de totu si fessant pigadas in cunsidériu totus […] is "destrossas ambientalis i económicas" chi custa àtera "tzerachia de passada", po sa mentessi difinitzioni chi ddoi est in su progetu Galsi, iat a podi arregalai a is sardus".
*Comitato ProSardegnaNoGasdotto
A Manca pro s’Indipendentzia
Sinistra Critica Sarda
Partito Comunista dei Lavoratori
Associazione Zirichiltaggia
Comunisti – Sinistra popolare di Cagliari e del Sulcis
Disarmiamoli Sardigna
Social Forum
Solarussa in Movimento
Liberta’ Sarda
Comitato Carlofortini Preoccupati
Gruppo Tutti i sardi contro il Galsi
Az.namusn.art (collettivo artistico)
Meetup 31 (Amici di Beppe Grillo in Sardegna)
Collettivo Anticapitalista Sardo
Claudia Zuncheddu (consigliere regionale)
Massimiliano Mazzotta (regista)