Scopiat s'aràbbiu de su póbulu contra a Equitalia. In milla in Casteddu po pediri s'apricu de s'artículu 51

(IlMinuto) – Casteddu, 10 de su mesi de totussantus - Apricai debressi s'artículu 51 de su Statutu, norma chi permitit a sa Giunta Regionali de pediri a su Guvernu italianu sa "suspensioni de s'apricu de una lei o de unu provedimentu de su Stadu in matéria económica e finatziaria […] chi fait dannus mannus a sa Sardìnnia". Cun custu obietivu su movimentu contra a Equitalia at manifestau custu mangianu in Casteddu, a faci de sa domu de sa Regioni in s'arburada Trentu. S'arrabiu mannu de is manifestantis, de su pópulu de is partidas iva, contra a classi política sarda giudicada de is diversus interventus comenti managa a impitai su Statutu e s'artículu 51 po difendi is interessus de s'ecunumia sarda. In pratza puru una de is vìtimas prus connotas de su "sistema Istudius de setori-Equitalia", Natalino Nissitti, bogau pagu tempus fait de sa domu de Masainas bendia a s'asta. A su pichetu ant pigau parti - chentza de banderas de partidu - is membrus de su "Movimento Sardi Liberi", Irs, Malu Entu, "Artigiani e commercianti", No Radar, "Antiequitalia", Sardigna Natzione, aMpI, "Sinistra Critica Sarda", "Movimento Cinque Stelle", Pcl e una delegatzioni de sa "Nave degli indignados": sa nai atracada in su moru Ichnusa ocupau de is 83 traballadoris lissentziaus de sa Enermar e imoi diventau basi de is contiendas de su "Movimento pastori sardi" e de is precàrius Csl e Cesil. S'atopu de unu contibizu de su movimentu "antiEquitalia" cun su presidenti Ugo Cappellacci - tirau a longu - est cumentzau a is 14.30 in sa domu de Villa Devoto. In su tratempus in s'arburada Trentu sighit fintzas a sa fini s'isciòpiru de su fàmini de seti féminas sardas, chi de lúnis funt chentza de papai po pediri s'apricu de s'artículu 51 de su Statutu.