In Pauli si chistionat de ratzismu a 100 annus de su maceddu de Itri: sa destrossa de is sardus

(IlMinuto) – Casteddu, 23 de su mesi de totussantus - Funt passaus 100 annus de sa destrossa de Itri: su maceddu de is sardus. In Itri, una bidda de su meridioni de su Laziu, in su mesi de argiolas de su 1911 furiant stétius bocius seti operàjus chi furiant ingunis impari a àterus cuatruxentus personis po traballai a su fàbricu de sa ferruvia. Su maceddu fut aprontau e fatu de sa genti de su logu - operàjus e massarzus - intzulau de sa camorra - poita is "sardegnoli" si furiant arrefudaus de pagai su "pizzo" - e cun s'adduimentu de is autoridadis: síndigu e carabineris po primus. De custu maceddu scaresciu - e in su tempus scabudau de s'Avanti puru - e de su ratzismu de ariseru e de oi s'at a chistionai cenàbara chi benit, 25 de su mesi de totussantus, a is 18.00, in Pauli, cun is istudiantis de s'Istitutu Alberghieru Gramsci. Su merì at essi obertu de sa proietzioni de su film “Sangue verde”, asuba de is fatus de Rosarnu. "Un'acuntéssia - si ligit in d-una nota - chi tocat a dda discuti po dda cumprendi. Cumprendi cantu si podit essi ratzistas e ita si podit fai po abati custa maladia". S'atopu est aprontau de su "Collettivo per una autentica democrazia partecipata", chi de mesis meda est apicighendi in Pauli manifestus cun s'iscrita "ITRI. UNA DESTROSSA SCARESCIA. DDOI EST STÉTIU UNU TEMPUS INNOI IS NIEDDUS FURIAUS NOS".