Chistioni Rom: s’Asce su cumandanti de sa Politzia munitzipali de Ceraxius

(IlMinuto) – Casteddu, 29 de su mesi de totussantus - "Si funt presentaus in noi po bogai una família de Rom aghillia de unu privau, in su comunu de Ceraxius, chentza nisciunu mandau, arrefudenti de si fai identificai e de donai calisisat verbali de s'atzioni" Est cantu narat cun d-unu comunicau de imprenta su presidenti de s'Assótziu sardu contra a s'isolamentu (Asce), Antonello Pabis, chi at denuntziau su comandanti de sa Politzia munitzipali de su comunu in provìntzia de Casteddu po su modu de interventu, acontéssiu su mangianu de su 3 de su mesi de totussantus, chi at biu protagonistas unus cantu de Vigilis urbanus e àterus duus dipendentis de s'aminitratzioni comunali. Su fatu (chi s'Asce definit "s'úrtimu atu de una fibera longa de amaletzus de parti de su comunu Ceraxius contra a su meri de su terrenu po fai stresiai a sa família Rom" est stétiu sinnalau puru a Amnesty International. De s'istadi passada Pabis aghillit in d-unu terrenu suu una família Rom chi bivit in is camper. S'interventu de sa Politzia Munitzipali est acontèssiu po mori de unu fàbricu fatu po s'arreparai de su frius, fàbricu cunsiderau abusivu. "Depiant o boliant - narat Pabis - bogai duus antzianus, duas féminas giòvanas, duus piciocus, una pipia de 12 mesis e una criadura de cincu mesis. Mancai is protestas de su meri, is vigilis si funt frimaus in su terrenu serrau po 3 oras e mesu, cun prepoténtzia".