Tzensimentu 2011. PSd’Az: annullai su chistionàriu chi raiat a sa língua sarda

(IlMinuto) – Casteddu, 20 de su mesi de ledàminis - Amanniat in Sardìnnia sa protesta contra a su Tzensimentu 2011 de sa populatzioni. Agoa de sa denúntzia de su Comitadu pro sa Limba sarda de cida passada, imoi su consilleri regionali de su PSd’Az, Efisio Planetta, pedit a su Presidenti de sa Regioni, Ugo Cappellacci, de annullai a su chistionàriu atuali e de fai in modu chi bengat scritu puru in língua sarda. Su rapresentanti sardista pedit chi siant arraspetaus is cómpitus chi sa lei regionali 26 de su 1997 intregat a sa Regioni e is printzípius de amparu de is minorias linguìsticas prevìdius de sa lei 482 de su 1999, arraspetaus in is chistionàrius de su Tzensimentu de is àterus logus. In àteras Regionis a Autonomia ispeciali - iat pretzisau difatis Su Comitadu – innui s'agatant minorias linguìsticas, comenti sa slovena, sa sud tirolesa, sa valdostana e sa ladina, candu funt stétius aprontaus is módulus custas funt stétias pigadas in cunsidériu in sa língua insoru o in su Tzensimentu de is minorias linguìsticas chi ddoi funt".