Radar militaris: mérculis is Comitaus in pratza in Casteddu. Assembreas públicas cun Antonio Mazzeo

(IlMinuto) – Casteddu, 3 de su mesi de ledàminis - S'oberrit una cida de traballu mannu po is Comitaus No Radas Sardìnnia. Su sit in aprontau po mérculis 5 de su mesi de ledàminis in pratza de su Cramu, a is 9.00 - po s'udiéntzia de su Tar chi at a detzídiri asuba de is dimandas de fàbricu de is radar, presentadas cun is arrecursus de su Comunu de Tresnuraghes e de s'assótziu Italia nostra - chi at essi difatis afiacau de na fibera de assembreas públicas cun Antonio Mazzeo, intre is primus giornalistas a denuntziai s'operatzioni chi - scéti po is radar de sa Guardia Costera in is costeras de su stadu italianu - previdit un'impreu de dinai po pagu prus de 350 milionis de eurus (de su Secolo XIX).Mazzeo, autori de su líburu "I padrini del ponte", at a partitzipai a is atopus públicus in programa cras in Santu Antiogu (17.30, àula consiliari), mérculis in Casteddu (17.30, àula magna de Sciéntzias Políticas) e gióbia in Frùmini Mayori (17.30, àula consiliari). "A oi in Sardìnnia - est stétiu acrarau in sa cuferéntzia de imprenta de sàbudu passau in sa sedi de s'Usb - funt stétius fabricaus duus radar de sa Guardia Costera. Unu in Sa Madalena, ddoi est giai de su 2003, e unu in Santu Elias, in Casteddu, s'úrtimu, est stétiu fabricau in su 2007".