Presonis in Sardìnnia. Caligaris (Sdr): "No funt stétias arrespetadas is iscadéntzias po sa sanidadi in is presonis"

(IlMinuto) – Casteddu, 3 de su mesi de ledàminis - Mérculis 5 de su mesi ledàminis at a scadèssiri su tempus poita su Guvernu donit a is Aziendas sanitàrias de su territóriu sardu is benis e is aposentus de sa sanidadi de is presonis, chentza chi "s'acórdiu intre su Ministeru de sa Giustítzia e sa Regioni siat stétiu detzidiu comenti di depit". Est cantu denuntziat cun d-una nota Maria Grazia Caligaris, presidenti de s'Assótziu "Socialismo Diritti e Riforme". "Fintzas a imoi - acrarat Caligaris - funt stétius arrespetaus is métodus po su trasferimentu a su Serbítziu sanitàriu de sa Regioni de is fainas, […] ma no est stétiu fatu niscunu passu cuncretu po acrarai is chistionis prus delicadas de su finantziamentu". Su 31 de su mesi paschixèdda est fissada s'iscadéntzia de su Ministeru de sa Giustítzia po frimai su finantziamentu a sa sanidadi de is presonis. "Si sa Regioni - pretzisat sa rapresentanti sotzialista - no at a fai su própriu proponimentu s'iscadéntzia at a diventai definitiva". In Sardìnnia sa riforma de sa sanidadi de is presonis tocat 2.200 presoneris - contendi puru is minoris chi s'agatant in su presoni de Cuartuciu - e pagu prus de 250 traballadoris.