Militarizatzioni: in su Surcis firmada noa a is radar. Su sit in in Casteddu e s’assembrea cun Mazzeo

(IlMinuto) – Casteddu, 6 de su mesi de ledàminis - Mesu bitória po is Cumitaus. Ariseru sa Càmera de Consillu de su Tar de sa Sardìnnia at difatis cunfirmau sa firmada a su fàbricu de is radar de sa Guardia de Finantzia in Frùmini Mayori e in Santu Antiogu, in abetu de sa senténtzia prevìdia po su mesi de gennàrgiu o su po mesi de fiàrgiu. Sa senténtzia po su fàbricu de s'istrutura in Tresnuraghes est invecis po su mesi de totussantus. Po custa acuntéssia, perou, s'abogau de su Statu at batacollau sa legalidadi de s'arrecursu, chi iat a essi stétiu presentau a tradu. Po s'udiéntzia de su Tar is Comitaus no Radar ant aprontau unu sit in a faci de sa domu de su Tar Sardìnnia, pratza de su Cramu, in Casteddu: centu e prus personis chi rapresentànt is Comitaus territorialis e is movimentus chi funt contra a sa militarizatzioni de sa Sardìnnia. De radar s'est chistionau puru in su merì cun d-un'assembrea in s'àula magna de sa Facoltadi de Sciéntzias Políticas de Casteddu.Su giornalista Antonio Mazzeo, su físicu Massimo Coraddu e su rapresentanti de su Comitau No Radar de "Capo Pecora" Graziano Bullegas ant analizau sa chiostioni de dónnia furrungoni: is perígulus po s'ambienti e po sa saludi, is interessus políticus i económicus chi ddoi funt a pabas de su fàbricu de is 15 radar in is costeras sardas. Unu datu scéti: po su fàbricu de is cuàturu radar de sa Guardia de Finantzia Elm 2226 - fatus de sa israeliana Elta System - Almaviva spa iat ai pigau 5.461.669,67 eurus. Unu milioni e prus de eurus a radar.