Movimentu pastoris sardus: in 200 chentza de nai nudda primu, a faci de Villa Devoto

(IlMinuto) – Casteddu, 26 de su mesi de austu - Protesta a duus frimadas po su Movimentu Pastoris Sardus. Custu mangianu pagu prus de 200 pastoris de Mps ant manifestau primu a faci de is domus aministrativas de Argea e Laore in bia Caprera, in Casteddu, po protestai - comenti at acrarau a IlMinuto Andrea Cinus "contra a su tardamentus in is pagamentus de is agiudus comunitarius chi iaus ai depiu arriciri de mesis meda e chentza de is calis is aziendas nostras no podint bivi poita no podint pagai is pagamentas de s'Inps". A is 11.30 s'est detzidiu de si movi: is pastoris ant improvisau unu corteu chi in dexi minutus ddus at portaus a faci de s'intrada de Villa Devoto - in bia Oslava - innoi dooi furiat giai un'atopu intre su presidenti de sa Regioni Sardìnnia, Ugo Cappellacci, e una delegatzioni de parlamentaris sardus asuba de s'acontéssia de is comunus chi bolint liai cun sa manuvra TRemonti. Mps est lompiu a faci de Villa Devoto cun d-una dimandacrara: atobiai Capellacci e is parlamentaris sardus po pediri determinus a is chistionis de sa pastoria. Su Presidenti at rinviau su Monvimentu a un'atóbiu po is diris chi benint. A faciora de is 13.45 unu grupixeddu de parlamentaris at fueddau cun is pastoris de Mps in d-un'assembrea subitana in is scabas a faci de s'intrada de Villa Devoto. Una parti de is chistionus de is parlamentaris e de is senadoris est stetia batacollada a tzerrius de calencunu chi furiat manifestendi: "No si bastant prus is arrespustas de bosàterus. Boleus fatus".