“Mancai su handicap arrennesciu beni meda a tenni raportus cun is àterus”. Sa lítera de unu traballadori de su Comunu de Loceri a pustis de una delíbera “befa”

(IlMinuto) – Casteddu, 3 de su mesi de austu - Diploma de piritu agràriu, de agruténnicu e de geòmetru. Sandro Murgia, dipendenti de su Comunu de Loceri, disvantagiau ("no chistionu puru s'intendu beni") e militanti indipendentista at scritu a IlMinuto po denuntziai a sa chi bit comenti una ingiustitzia. Su nòmini suu po s'incàrrigu de responsaàbili de su Tzentru de Educassioni Ambientali e a Sustenibilidadi, est stetiu fatu de su responsàbilis de s'area aministrativa de su Comunu, ma Murgia est stetiu bullau de sa Giunta comunali cun d-una delíbera "befa", publicada duas bortas, e furriendi sa segunda borta su chi ddoi furiat scritu sa primu. Sa primu borta, difatis, in su documentu sa Giunta bullàt a Murgia scriendi "de no cunsiderai s'abilidadi de issu e totu a s'incàrrigu po mori de su handicap suu". In sa segunda delíbera - "torrada a publicai po mori de unu puntu faddiu de s'atu publicau su 26.07.2011" - sparessit dònnia referimentu a s'handicap: Murgia, "in abetu de torrai a aprontai is ofícius", benit remplasau in s'incàrrigu de un'àteru dipendenti, "is cumpeténtzias suas po s'incàrrigu permitint de aberri s'istrutura chi sendu in d-una fasi de cumentzu s'agatat in d-unu mamentu delicau". "Mancai su handicap chi tengu - scririt Murgia a sa redatzioni - arrennesciu beni meda in is raportus cun is àterus. Immoi is raportus chi tengu cun s'aministratzioni no funt bellus meda, naraus ca candu mi bint mi ndi liant su saludu po mori de essi cussu chi seu comenti tzidatinu [...]. Seu sèmpiri stetiu fracóngiu in is progetus de política indipendentista, bortas meda seu stetiu candidau in su Partidu indipendentista e cun Sardigna Natzione". "S'incàrrigu de responsàbili de su tzentru nou de educassioni ambientali - sighit a nai su dipendenti de su comunu in Provintzia de Ogiastra - no m'interessàt poita furiat unu de cuddus traballus chi donàt prus responsabilidadis e su dinai furiat su própriu. Po custu candu su responsàbili m'iat nau chi mi boliat donai s'incàrrigu dd'apu arraspustu ca no furiat cosa, ma sendu unu dipendenti gei mi dda iap'essi fata cabai e gei ddu iap'essi pigau su traballu. Duncas podit crei ca a ligi is motivatzionis chi at pigau sa Giunta po su sceberu de su responsàbili de su tzentru de educassioni ambientali m'ant lassau a buca oberta e mi seu intendiu ofendiu meda po su chi iant scritu".

Nova curregia su 4 de su mesi de austu