Amiantu: “Sa Regioni oblighit a is Asl a donai s’assistu giustu a is malàdius”. Cuferéntzia de imprenta Fds-Aiea

(IlMinuto) – Casteddu, 4 de su mesi de austu - Intre su 2006 e su 2009 sa lei regionali 22 de su 2005 at destinau 32 millionis de eurus po su smartimentu e sa bonífica de s'amiantu. Ma de is 20,35 millionis intraus in càscias de is Provìntzias est stetiu spéndiu scéti su 8,65 po centu. Est unu de is datus prus importantis chi funt bessius a pillu custu mangianu in Casteddu in sa cuferéntzia de imprenta aprontada de su consilleri comunali Enrico Lobina (Fds), cun sa participatzioni de Giuseppe Carboni de s'Assótziu Aiea. In Sardìnnia (datus 2000-2004) funt stetius registradas scéti 30 personis malàdias po mori de s'amiantu. Númerus chi - ant acrarau Lobina e Carboni - si faint biri unu monitoràgiu a nai scassu est pagu. "Sa lei 22 de su 2005 - est stetiu precisau in sa cuferéntzia de imprenta - tenit su méritu de ativai cun craresa sa 'guardania sanitària' (obrigatória e a gratis po chini at traballau cun s'amiantu). Mancai siant passaus cuàturu annus de s'aprou de candu est stetia fata sa lei, pagu genti connoscit custa oportunidadi e sa guardiania est maba a tucai. Poita sa Regioni no insistit cun is Asl, a is calis at donau su cómpitu de guardiania, po donai s'assistu giustu a is malàdius?".