Traballadoris ex Unilever. Esposito "cambiat idea": "Sa produtzioni abarrat frima. Bendu su fàbricu"

(IlMinuto) – Casteddu, 28 de su mesi de argiolas - Un'àteru scornu po is traballadoris de s'ex Unilever: s'istórica fàbrica de gelaus de Casteddu. Giuseppe Esposito - chi at pigau s'istabilimentu de s'arburada Marconi de sa multinatzionali po 2milionis e 50milla eurus - at cambiau idea ingíriu de pagu mesis. Su 10 martzu passau - in d-un'atóbiu chi s'est tentu in sa sedi de s'Assessorau de s'Industria in Casteddu - s'imprendidori iat fatu crei una cosa po un'àtera a is traballadoris, annuntziendi de tenni intentzioni de torrai a cumentzai sa produtzioni de is gelaus. Agoa de pagu tempus at cambiau is progetus chi teniat. "A pustis de su 10 de su mesi de martzu - acrarant is traballadoris - no eus prus biu su sennori Giuseppe Esposito. Is funtzionarius de s'assessorau s'ant fatu sciri ca at cambiau idea e bolit bendi su fàbricu [...]. Sa pantuma de s'afari edilitziu asuba de s'area est acanta meda".