Pranu triennali língua sarda. Sni: "S'Universidadi de Tàtari est contra a s'imparamentu de su sardu"

(IlMinuto) – Casteddu, 15 de su mes'e argiolas - "S'ateneu de Tàtari bit sa língua sarda unu beni archeológicu italianu e no un'esséntzia de sa natzioni sarda". Cun custus fueddus sa Cummissioni cultura de Sardigna Natzione bullat su documentu chi s'Universidadi de Tàtari at fattu asuba de su Pranu triennali de sa língua sarda aprovau de pagu tempus. "In is diris passadas - si ligit in d-una nota - a sa Cummissioni cultura de su Consillu Regionali, est arribau, de s'Universidadi de Tàtari,  unu documentu crítigu meda in is cunfrontus de su Pranu Triennali de sa língua sarda". "Crítigas chi lompit a tradu - narat s'organizatzioni indipendentista - chi a parri nostru funt fillas de unu pentzu cun craresa cuntràriu a s'imparamentu […] in língua sarda, puru de sa língua etotu e de is línguas 'alloglotte', e sa preferéntzia po s'imparamentu in italianu".