Pranu triennali língua sarda. Acadèmia: “No pigat in cunsidériu sa proposta de sa Provìntzia de Casteddu”

(IlMinuto) – Casteddu, 17 de su mes'e làmpadas - A sa fin'e de su mes'e maju sa Giunta regionali at aprovau su Pranu triennali po sa língua sarda 2011-2013. A pustis de ai analizau su documentu, s'Acadèmia de su Sardu cummentat su scritu cun d-unu comunicau de imprenta. "In su pranu - si ligit in sa nota - funt presentis puntus de primori e progetus bonus, tocat perou fai bessiri a pillu diversas 'criticità'. "Funt stetia ignoradas - narat s'Acadèmia – totus is propostas chi in is annus funt stetias fattas e presentadas in modu uficiali, arricendi puru s'aprou de is òrganus intermedius, in sceberu a su standard regionali cun basi logudoresa, connotu comenti Limba Sarda Comuna (LSC), bófiu de sa Giunta Soru e chi no est stetiu mai discutiu e aprovau in Consillu regionali". In su documentu - acrarat su comunicau - si pigat in cunsidériu sa "proposta de standard a dópia norma chi previdit sa mantessi dignidadi po su Campidanesu e su Logudoresu, chi s'agatat in su líbburu 'Arrègulas po ortografia, fonètica, morfologia e fueddàriu de sa Norma Campidanesa de sa Lìngua Sarda'". Una proposta aprovada a s'unanimidadi de su Consillu provintziali de Casteddu su 17 de su mes'e matzu de su 2010. "Su primu Consillu - precisat sa nota - chi apat fattu in modu democràticu unu sceberu aici importanti".