Diritus. Caligaris (Sdr) a Inps: “Tesseredda po assegurai s’arrespetu privacy de imbàlidus"

(IlMinuto) – Casteddu, 7 de su mes'e làmpadas - "Medas inbàlidus civilis a su 100%, dógnia borta chi s'agatant in su bisóngiu de esígiri unu diritu previdiu de is normas, si bint custrintus a ammostai sa documentatzioni cumpleta, ammostendi a allenus datus chi pertocant sa maladia". Est cantu denunciat cun d-una nota sa presidenti de s'assótziu "Socialismo Diritti Riforme", Maria Grazia Caligaris, a pustis de is diversas signalatzionis arricias de citadinus casteddaius imbàlidus custrintus a donai a s'Inps verbalis cumpletus de diàgnosi. "No totus scint - scririt Caligaris a su Presidenti de s'Istitutu Antonio Mastropasqua i a su Diretori Maurizio Nori - ca est consentiu presentai su verbali fotocopiau e chi de custu si podint scancellai is arrexonis chi ant portau a pigai s'inbalididadi". Sa presidenti de Sdr proponit a is capus mannus de s'Istitutu chi is inbàlidus civilis siant dotaus de unu tessereddu chi permitat de garentiri sa privacy. "Iat essi oportunu dotai custas personis- scririt Caligaris - de unu tessereddu de identidadi apropiau, dotau de fotografia, chi ammostit su status ma no motivu chi dd'at determinau".