Acuntéssia Bellomonte: in Casteddu cuferéntzia de imprenta po “denunciai a is acusas foras de contu chi ddi funt stetias movias”. Sàbudu a merì corteu in Tàtari

(IlMinuto) – Casteddu, 8 de su mes'e làmpadas - Sighiri a denunciai is acusas foras de contu chi benint movias a Bruno Bellomonte e a is àteras personis arrestadas duus annus fait cun s'imputu de ai progetau un'atentau cun d-unu modelleddu aereu radiucumandau po su G8 de su 2009 de Madalena, agoa trasladau in Abruzzu. Annuntziai progetus de lota po pediri de liberai a su dirigenti de a Manca pro s’Indipendentzia. Cun custus obbietivus s'at a tenni sàbudu chi benit in Casteddu (11.00, sedi Usb de Bia Madalena 20) una cuferéntzia de imprenta cun sa participatzioni de Caterina Tani (mulleri de Bruno Bellomonte), Antonello Tiddia Tiddia (Cumitau "lavoratori pro Bellomonte"), Claudia Zuncheddu (consilleri regionali) e unu rapresentanti de aMpI. S'apuntamentu cun is giornalistas at essi ghiau de Salvatore Drago. "Agataus scandalosu - si ligit in sa nota de imprenta - chi personis giuridicamenti innocentis (su primu gradu de giudítziu s'est ancora sboddiendi) potzant essi frimmadas in presoni agoa de ddus annus. Is personis arrestadas in su mes'e làmpadas de su 2009 - sighit su comunicau - funt ancora totus in regimi de presonia atzetuau una: Luigi Fallico, mortu po mori de una guta in su presoni de Viterbu". Asuba de sa morti de Fallico - mortu in cella su 23 de su mes'e maju passau cun totu chi de diris meda teniat is signalis de sa guta - est stetiu obertu unu protzedimentu po omicìdiu. Sàbudu a merì is aprontadoris de sa cuferéntzia de imprenta ant essi in Tàtari po participai a su corteu aprontau de a Manca pro s’Indipendentzia, cun tucada a is 16.30 de s'"Emiciclo" Garibaldi.