Acuntéssia Bellomonte: 18 diris de isciòpiru de su fàmini. Sa solidariedadi de is bascus de Askapena

(IlMinuto) – Casteddu, 29 de su mes'e làmpadas - Funt 18 is diris de fil'e pari de isciòpiru de su fàmini po pediri de liberai a Bruno Bellomonte, su dirigenti de a Manca pro s’Indipendentzia e sindacalista de duus annus e 19 diris in impresonamentu cautelari po mori de acusas chi no funt stetias mai cumprovadas: unu teorema (s'ammanitzu de un'atentau cun modelleddus aereu radiocumandaus a su G8 de Madalena) - acrarant is aprontadoris - foras de contu, comenti si bit de su processu chi s'est sboddiendi de unu bellu pagheddu de tempus". Oi no ant a papai Maurizio Faedda (a sa terza diri de fil'e pari de isciòpiru), Alessandro Murtas, Simona Pau e Antonello Turra. A sa protesta promòvia de su Cumitau "lavoratori pro Bruno Bellomonte" ant participau in totu pagu prus de 30 personis. A su costau de Bellomonte puru s'organizatzioni internatzionalista basca Askapena. "Oleus arremaciai - si ligit in d-una nota - sa solidariedadi nostra a su cumpàngiu Bruno Bellomonte, arrestau de duus annus de su stadu italianu po s'impignu frimmu postu po sa libertadi de terra e de pópulu traballadori sardu. Espressaus puru s'apógiu nostru a is cumpàngius i a is cumpàngias chi funt mandendu ainnantis s'isciòpiru de su fàmini po denuntziai s'acuntéssia de su militanti de A Manca pro s’Indipendentzia. Pedeus puru a su stadu italianu de dd'acabai cun sa soprimidura contr'a su movimentu indipendentista sardu e contr'a s'organizatzioni A Manca pro s’Indipendentzia e  pedeus puru de reconòsciri a su  pópulu sardu is diritus suus".