"S'àcua no si bendit", dibbàtidu in sa Cineteca sarda a duas cidas de su referendum

(IlMinuto) - Casteddu, 30 de su mes'e maju - Abetendi a su referendum de su 12 e de su 13 de su mes'e làmpadas si fait sèmpiri prus mannu s'impignu de is organizatzionis chi lotant contr'a a sa privatizatzioni de s'àcua. Cras a merì in Casteddu (20.00, Cineteca sarda de s'arburada Trieste) s'at a tenni un'atóbiu de informatzioni e cunfrontu "asuba de is dimandhas referendarias e asuba de su valori de s'Àcua comenti Beni Púbblicu chi no si depit bendi". S'apuntamentu s'at a oberri cun sa proietzioni de "La bolletta dell’aria" pigau de su film "Strane storie" de Sandro Baldoni i at a sighiri cun d-una cuferéntzia-dibbàtidu cun sa participatzioni de Nicola Musu (Campagna Àcua Beni Comunu) e de Vania Satzu, economista de s'isvilupu sostenìbili. S'atóbiu est aprontau de is assótzius "Oscar Romero", "100%EquoeSolidale", de su grupu "Mani Tese" Casteddu e de sa Cineteca sarda-Sociedadi umanitaria.