Sa morti de Luigi Fallico: lassau in cella cuntotu chi teniat is intzimius de s’antrecoru, aMpI: “Ant bociu a unu comunista”

(IlMinuto) - Casteddu, 24 de su mes'e maju - "Mortu Fallico, ex br chi boliat tocai a su G8". Cun custu títulu in sa primu pàgini de oi sa "Nuova Sardegna" donat sa nova de sa morti de Luigi Fallico, acontéssia ariseru in su presoni de Viterbu. Unu títulu frassu: difatis Fallico morrit de innotzenti, a pustis de duus annus de galera cun s'acusa - chi no est stetia provada - de ai progetau, impari cun Bruno Bellomonte i àterus cumpàngius, un'atentau cun d-un'aéreu radiucumandau abetendi a su G8 de Madalena. Un'acusa chi udiéntzia po udiéntzia su processu cumprovat essi sèmpiri de prus senz'e fundamentu e senz'e sustàntzia: cussa chi est in cursu est una bera persecutzioni a personis cusada de motivus políticus. Epuru oi 60milla famílias sardas - custu su númeru de is copias chi dógnia diri bendit su giornali de su grupu s'"Espresso" - ligint unu títulu in primu pàgini chi no lassat dúbbius. Títulu sighiu de custas ses rigas, chi su própriu no tentit incertesas: "S'ex Br Luigi Fallico, 59 annus, est mortu in presoni struncau de una guta. Fut issu chi iat postu in is guaius a Bruno Bellomonte cun is progetus de is atentaus a su G8 de Madalena". Luigi Fallico no at a podi arraspundi a custus fueddus afrentosus. Aici, invecis, a Manca pro s’Indipendentzia – organizatzioni chi tenit a Bellomonte tra is dirigentis - descririt su modu chi at portau a Fallico a sa morti. "Ant bociu unu comunista! Custu mangianu (ariseru ndr) est stetiu agatau mortu in sa cella de su presoni de Viterbu, aundi furiat inserrau, su cumpàngiu Luigi Fallico. Mortu struncau de una guta. Chi no est stetia arrepenti. Furiat de su 17 de su mes'e maju chi Luigi no s'intediat beni. S'únicu cuntrollu chi dd'ant fattu est stetiu cussu de ddi mesurai sa pressioni, chi ammostat valoris pagu bellus e perigulosus meda. Est stetiu torrau a mandai in sa cella sua cun d-una tachipirina. A betai de essi bociu de cussa chi furiat cun craresa una guta". Fueddus anàlugus funt stetius naus de s'abbogau de Fallico, Caterina Calia.