Nucleari. "Cun sa bitória de su referendum cumentzat su camminu de soverania e indipendentzia", aMpI arremaciat a is fueddus de su Ministru Vito

(IlMinuto) – Casteddu, 19 de su mes'e maju - "Su pópulu sardu est stracu de fabas". Aici su diretivu natzionali de a Manca pro s’Indipendentzia cummentat a is afirmaduras de su Ministru po is raportus cun su Parlamentu, Elio Vito, asuba de sa bitória de is EJA - cun su 97,13% - de su referendum contr'a su nucleari chi s'est tentu su 15 e su 16 de su mes'e maju - acrarat aMpI - "afirmat ca s'ésitu de su referendum consultivu est significativu scéti de s'ategiamentu de sa genti sarda e no de sa boluntadi de s'Itàlia e duncas ndi declarat s'illegalidadi. Ma no est totu. Su Ministru, sennori italianu, declarat cun ignòrantzia e barrosia ca in Sardigna no ddoi est stetia una campagna informativa giusta asuba  de s'acasigiu de is centralis nuclearis e de is depósitus de aremus, poita  no s'est fueddau comenti si depit  de is 'arriscus' e de is 'possibbilidadis'  chi custas donant a sa terra nostra, una terra de sèmpiri stuprada de s'Itàlia". "Sa bitória de su referendum - precisat s'organizatzioni de sa manca indipendentista - est s'istraordinària manifestada de unu pópulu chi totu impari narat de nono a is determinus chi is capus mannus si bolint impòniri a sa marolla, est su camminu de unu pópulu  abia de sa soverania e s'indipendentzia".