"Intraversaus is consumus asuba de is traghetus", grupu Facebook contr'a sa carestia de is billetus. Su Consillu regionali aprovat "interventu impellenti" Saremar

(IlMinuto) – Casteddu, 5 mes'e maju - "No podeus abarrai frimmus a abetai is arrespustas de s'antitrust e is solutzionis postas in pràtica de sa Regioni chi comentisiollat cundivideus". Cun custas motivatzionis unu grupu de citadinus at decidiu de cumetzai, atressu de unu grupu in Facebook, a una campagna de "boicotadura de is consumus" asuba de is traghetus chi collegant sa Sardigna a sa penísula. Unu bolantinu de protesta contr'a sa carestia de is billetus de is nais at essi donau su 13 de su mes'e maju in is portus de Genova, Livornu, Civitavecchia, Casteddu, Terranòa, Pòrtu Turre e Figari. In s'interis ariseru su Consillu regionali de sa Sardigna at aprovau sa proposta de sa Giunta de aprontai is collegamentus de mari cun sa Penísula atressu de sa Saremar (compagnia de nàvigu de propriedadi de sa Regioni) e s'afitu de unus cantu de nais. Pagu primu de is 23.00 est stetiu difatis aprovau un'odg chi donat su permissu a "un'interventu de tipu sperimentali e impellenti, po tres mesis, de su 15 de su mes'e làmpadas a su 15 de su mes''e cabudanni, po fai fronti a su fenómenu de sa carestia de is traghetus chi no tenit ni conca no peis".