Eletzionis comunalis. Zuncheddu: “‘Repubblica’ violat sa par condicio”, in Casteddu dexi candidaus a síndhigu

(IlMinuto) – Casteddu, 9 de su mes'e maju - "'La Repubblica' comenti Rete Cuatru". Po Claudia Zuncheddu, candidada a síndhigu de s'alleàntzia indipendentista (Irs, Sni, Paris, Indipendentistas cun s'acotzu esternu de aMpI) a is eletzionis comunalis de Casteddu, su giornali dirigiu de Ezio Mauro "violat a sa lei asuba de sa par condicio e fait disinformatzioni". Zuncheddu scririt una lítera a Alberto Statera, autori de un'artículu pubblicau su 27 de su mes'e arbili, chi - acrarat sa rapresentanti indipendentista - donat una rapresentatzioni imcumpleta de is candidaus a síndhigu e de is alleàntzias chi ddoi funt. "In su scenàriu políticu casteddaiu - scririt Zuncheddu - comenti candidaus a síndhigu, no ddoi funt scéti is tres óminis, (fillus de arringheramentus de sa política italiana) pigaus in cunsidériu de fustei, ma ddoi funt àterus candidaus e àterus arringheramentus comenti po esémpiu cussu de mimi etotu, chi seu a sa ghia de un'alleàntzia indipendentista e cívica. Un'eventu istóricu de importu mannu in Sardigna". In Casteddu funt dexi in totu is candidaus a síndhigu in is eletzionis comunalis de su 15 e de su 16 de su mes'e maju: sa mantessi Claudia Zuncheddu (Alleàntzia indipendentista), Massimo Fantola (Centrudestra), Massimo Zedda (Centrusinistra), Michela Melotti (Pcl), Ignazio Artizzu (Fli), Ornella Demuru (ProgRes), Emanuela Corda (Movimentu "Cinque Stelle"), Patrizia Serra ("Onestà e Progresso"), Gianmario Muggiri ("Nuovo Msi").