Acuntéssia Bellomonte: bullada sa dimandha de spresonamentu. S’11 de su mes’e làmpads in Tàtari manifestada a duus de s’arrestu

(IlMinuto) - Casteddu, 25 de su mes'e maju - Sa dimandha de spresonamentu de Bruno Bellomonte, presentada cida passada de is abbogaus de su dirigenti indipendentista e de manca est stetia arrafudada. Ddu fait sciri cun d-una nota de imprenta su diretivu natzionali de A Manca pro s’indipendentzia. S'organizatzioni de sa manca indipendentista sarda aprontat po sàbudu 11 de su mes'e làmpadas una manifestada in Tàtari: a duus annus e una diri de s'arrestu de Bellomonte in Roma. "A pustis de duus annus de galera colonialista e de disterru de su dirigenti políticu indipendentista Bruno Bellomonte - scririt aMpI - duus annus de acanarjadura a àterus ses cumpàngius italianus, a pustis de sa morti po nudda fortùita de unu de issus, Luigi Fallico, in data 24 de su mes'e maju est stestia bullada sa dimandha de spresonamentu a su patriotu, cuntantu chi siat bessia a pillu cun craresa de su processu sa natura política e de acanarjadura de custa bufonada processuali". "Bruno - sighit sa nota - rapresentat sèmpiri de prus su símbulu de s'aciocu tra is apretus de liberatzioni natzionali e su mantenimentu de sa dominatzioni italiana in su Territóriu nostru. Po tanti A Manca pro s'Indipendentzia avisat a totus is fortzas indipendentistas i a cussas contr'a su colonialismu i a su pópulu sardu totu a participai a sa manifestada natzionali de sàbudu 11 de su mes'e làmpadas in Tàtari a cumentzai de is 16.30".