Sardigna 2025?. A su votu po s'indipendentzia. Pesa e s'Universidadi de Casteddu premiant a testus e fumetus asuba de custu ipotéticu scenàriu

(IlMinuto) – Casteddu, 20 de su mes'e arbili -  A donai s'ocasioni fantàstica a su cuncursu "Ucronias dae sa Sardigna", est sa proposta aprontada de s'assótziu de is istudiantis indipendentistas Pesa cun s'apógiu de s'Universidadi de Casteddu,  e ddu fait cun su títulu chi oberrit a su "Corriere di Sardegna": "Sa Sardigna a su votu po s'indipendentzia". A su cuncursu podint participai totus is istudiantis universitàrius sardus, presentendi testus o fumetus in língua italiana o in língua sarda. Is interessaus ant a depi pigai spuntu de su scenàriu de sa primu pàgini de su cotidianu fantàsticu "Corriere di Sardegna", donada impari a su regulamentu de su cuncursu: un'Ísula divídia tra unionistas e indipendentistas, chi s'8 de su mes'e làmpadas de su 2025 sceberat tra essi de s'Itàlia o essi Soverana. Po s'iscriri ddoi est tempus fintzas a su 30 de su mes'e làmpadas de su 2011: is bincidoris ant essi premiaus cun bonus po is còmporas de impitai in libraria chi andant de is 100 a is 300 eurus.