"Fustei torrit a fai su commercialista", Malu Entu pedit is dimissionis de Cappellacci po "aggràbius a s'istória de sa Sardigna"

(IlMinuto) – Casteddu, 7 de su mes''e arbili - "Dimandha de dimissionis po aggràbius a is Sardus e a s'istória de sa Sardigna". Est custu s'ogetu de sa lítera oberta, chi Paris-Malu Entu at mandau a su presidenti de sa Regioni Sardigna Ugo Cappellacci. Su partidu de Doddore Meloni acusat a su presidenti de sa Regioni de ai scancellau "s'única parti de s'istória sarda chi si fait fierus" de sa comunicatzioni istitutzionali a pagamentu "Sardus e fradis de Itàlia", pubblicada in is diris passadas in is giornalis prus importantis de s'Ísula!". "Ita fini at ai fattu - si ligit in sa lítera - Mariano IV po Cappellacci? E Ugone III aundi dd'at ai postu? Bai e circa in cali era at ai postu Eleonora d’Arborea!". "Fustei - sighit su documentu - comenti si permitit de ofèndiri a si sardus e a s'istória nostra in custu modu?". Sa lítera, longa meda, si serrat cun d-un'inditu de tipu professionali fattu a su presidenti de sa Giunta regionali: "Fustei torrit a fai su commercialista".