Una fémina chi tramandat s’arti sua. In Tàtari cursu a gratis de Musàicu cun Francesca Tedesco

(IlMinuto) – Casteddu, 7 de su mes''e martzu - "No ddoi est arruga prus segura po si fuiri de su mundu chi s'arti, ma no ddoi est acàpiu prus seguru cun issu chi s'arti". (Johann Wolfgang Goethe)

"S'imbidri est sa maia chi mi contat", funt custus is fueddus chi Francesca Tedesco iat impitau po definiri su raportu chi tenit cun s'imbirdi, furiat su 6 de su mes''e totussantus de su 2010 po su progetu Formas,  unu progetu promòviu de su giornali nostru. A pustis de tres mesis de cussa intervista Tedesco, maista de s'Académia de is "Belle Arti" de Tàtari, at a cumentzai in sa citadi turritana unu cursu a gratis de Musàicu in tèsseras de imbirdi. Su cursu, de 100 oras, est promòviu de s'Assótziu Agorà e nascit in su contestu de is progetus de animatzioni sociu-culturalis e sociu-educativas apogiadas de su Comunu de Tàtari. Amori e maia difícilis de spricai scéti a fueddus, epuru sa maista Tedesco ddus at a arregalai a chini fait su cursu, a totus cussus chi s'ant a bolli cunfrontai cun custa matéria e cun is ammàinus de luxis suus: "S'imbirdi - acrarat sa maista - est matéria chi si trasformat, si fait liquidu e frimmu, caborau, opacu o trasparenti, callenti o fridu, úmili o pressiosu [...]. S'imbirdi est unu donu miríficu de sa terra i est in custas propriedadis suas su sensu de sa maia chi seu narendi!".

Po ndi sciri de prus asuba de is modalidadis po s'iscriri a su cursu telefonai a is númerus: 079252674 – 3482631781 o scriei un'email a s'indiritzu: Vetr.arte@tiscali.it