Traballu. Assessori provintziali Cordeddu e Lobina: "Manca avisit sa mesa po is traballadoris Esiea"

(IlMinuto) – Casteddu, 16 de su mes''e martzu - Sa Regioni Sardigna depit avisai debressi "una mesa po sa firma de un'acórdiu po torrai a pigai is traballadoris de s'Esiea". Est cantu pedint is assessoris de su Traballu de sa Provìntzia de Casteddu, Lorena Cordeddu, e de sa Provìntzia de su Campidanu de Mesu, Simona Lobina cun d-una nota unia mandada a s'assessori regionali de su Traballu Franco Manca.

Po Cordeddu e Lobina is traballadoris de s'enti de imparu professionali Esiea, a oi in mobilidadi in dèroga, depint essi insertau in is mantessi camminus po essi torraus a pigai a traballai, camminus ativaus po is traballadoris de is entis de imparu chi arricint sa cassa integratzioni istraordinària, comenti narat s'acórdiu firmau su 10 de su mes''e totussantus passau. "No si podit prus abetai ancora - acrarant Lobina e Cordeddu - a donai arrespustas cuncretas a sa chistioni. Puru poita is traballadoris chi benint de s'Esiea funt medas [...] e cun d-un'esperiéntzia culificada e de medas annus, un'esperiéntzia fatta in cumpartu de s'imparu professionali".