“Traballadoris in ‘mobilidadi’ in is entis de su territóriu. Sa dinúntzia de is assessoris provintzialis Cordeddu e Lobina

(IlMinuto) – Casteddu, 3 de su mes''e martzu - Is traballadoris in "mobilidadi in dèroga" chi traballant in is entis de su territóriu bivint oi una cunditzioni de istrobbu sociali e económicu mannu meda: de unu scantu mesis traballant senz''e biri unu soddu. Ddu denunciant cun d-una nota de imprenta a duas manus is assessoris provintzialis de su Traballu de Casteddu, Lorena Cordeddu, e de su Campidanu de Mesu, Simona Lobina. "A oi - acrarant is duus assessoris - is traballadoris no arricint sa paga po su serbítziu fattu po is Entis. Est de unus cantu mesis, difatis, chi no pigant nisciuna indennidadi de mobilidadi e nisciuna integratzioni regionali". Is duus rapresentantis de is Giuntas provintzialis de Casteddu e de su Campidanu de Mesu pedint debressi s'interventu de s'Assessorau regionali de su Traballu. "Oramai - precisant Cordeddu e Lobina - sa situatzioni est diventendi grai meda, prusatotu po is arragus chi is traballadoris etotu tenint a si movi po andai a traballai. Po unu nùmeru mannu de traballadoris, e po is famílias insoru, s'ammortitzadori sociali rapresentat s'únicu sustentamentu".