"Is gherraiolus ant prantau is tendas insoru in Sardigna": presidiu de Malu Entu in Deximu Mannu. Su pensu de Irs

(IlMinuto) – Casteddu, 28 de su mes''e martzu - Sa Sardigna est sèmpiri de prus sa portaèreus de sa Nato in su Mediterraneu. Funt giai 22 is aèreus spagnolus, olandesus e de is Emiratus arabus in sa pista de Deximu Mannu. Acanta de s'aereoportu militari, de sàbudu a mangianu, ddoi est unu sit in permanenti contra a su trisinamentu de s'Ísula in sa gherra Nato-Libia. Sa protesta est aprontada de is indipendentistas de Malu Entu. "Totus is istadus gherraiolus de su mundu - scririt su presidenti Doddore Meloni - ant prantau is tendas insoru in Sardigna! Ant portau is aèreus insoru prenus de bombas e is nais insoru prenas de míssilis, e is sardus ita faint? Si cintint e abarrant castiendi! Ma nos, indipendentistas Maluentinus, boleus sa paxi universali e no acetaus chi de sa terra nostra tuchint ordíngius chi arregalant morti". Asuba de chistioni fueddat puru Irs. "Sa Sardigna - narat su movimentu indipendentista de Gavino Sale - est sfrutada e impitada ancora una borta de s'Itàlia e de is istadus chi dd'acumpangiant in cust'atzioni militari comenti una colónia, sa colónia impitada comenti praxit a is 'meris mannus' de s'Europa".