“Sindrome di Quirra”: su 13 de su mes”e fiàrgiu Die de sa Vardania contra a “su perígulu chi bocit”

(IlMinuto) - Casteddu, 2 de su mes''e fiàrgiu - "Chini bocit in Quirra?". Est s'abbisóngiu de donai un'arrespusta a custa dimandha chi at fattu movi su Cumitau Sinonucle a aprontai - a pustis de sa fortuna de sa manifestada "no nuke" Teulada de su mes''e ledàminis passau - una Die de sa Vardania noa in sa frazioni de Biddeputzi. S'apuntamentu est po domínigu 13 de su mes''e fiàrgiu in s'area de sa parti de ananti a su rastrégliu de su Poligonu Interforze de Capo San Lorenzo. Una diri de festa, protesta e dibbàtidus (a primu merì in d'unu logu de decídiri) chi at a cumentzai ingíriu a is 11.00 cun s'assétiu de unu brunzitu nuràgicu "A Vardania de Quirra e de sa Sardigna totu" e de unu clonixeddu de sa "Madre dell'ucciso" de Ciusa comenti signali de lutu, cun sa scrita "Bos fagimus lutu Mortos de Quirra". "Candu sa morti de una perdoni no est 'normali' - si ligit in d'una nota fatta connosci de su Cumitau Sinonucle - est unu bocimentu, calincuna cosa est bocendi a is personis in su territóriu de Quirra, est necessària sa Vardania colletiva. Est necessàriu individuai cussu chi est su perígulu, cussu chi bocit po destrui cun fortza a sa càusa e po pretèndiri de is responsàbbilis su pagamentu de is dannus giai tentus e po cussus benientis.