“Sindrome di Quirra”. Onnis: “Is datus asuba de is pastoris no funt adatus a sa circa”. In Facebook grupu “Testiamo l’uranio impoverito sul senatore Gallo”

(IlMinuto) – Casteddu, 22 de su mes''e fiàrgiu - Fai esperimentus in su territóriu po cumprendi chi s'uraniu impoveriu est diaderus perigulosu. In pagus oras sa proposta 'e macus fatta de su senadori Cosimo Gallo (Pdl) - presentada mércuris passau in Roma in s'atóbiu, dedicau a su Poligonu de Quirra, de sa Cummissioni parlamentari de inchiesta asuba de s'uraniu impoveriu - at arregortu de parti de is fortzas políticas unus cantu de reazionis negativas. In Facebook funt giai 97 is personis chi si funt iscritas a su grupu "Testiamo l'uranio impoverito sul senatore Cosimo Gallo".

Gallo, 67 annus, est nàsciu in Martano, in provìntzia de Lecce. In su 2008 benit eligiu in su Senau in is scuadras de su "Popolo della Libertà". Imprendidori, Gallo fait parti de sa Cummissioni fissa Traballus púbblicus-Comunicatzionis, de sa Cummissioni de inchiesta asuba de s'uraniu impoveriu e de sa Cummissioni istraordinaria po sa tutela e sa promotzioni de is diritus umanus. In s'atóbiu de su 16 de su mes''e fiàrgiu est stetiu ascurtau puru Antonio Onnis, Cordinadori de sa Cummissioni Ténnica de espertus asuba de su Poligonu de Quirra. Onnis at nau custu de su relatu de is veterinàrius de is Asl de Lanusè e de Casteddu, raportu chi at remarcau sa preséntzia de malis mandiadoris meda grais in su 65 po centu de is pastoris - 10 po 18 pastoris - chi traballant in su ràgiu de 2,7 chilómitrus de su Poligonu interfortze de Capo San Lorenzo. "Su relatu de is duus veterinàrius dot. Mellis e dot. Lorrai" - at nau Onnis - est prenu de novas asuba de is baloris analìticus chi no parrint adatus a essi pigaus come basi po s'isvilupu de una circa epidemiologica de tipu sistemàticu".